Assumpta

Ina kang nag-aruga sa akin
sa apat na salin ng panahon.

Pipi kang saksi
sa aking mga luha’t halakhak,
sa aking mga musmos
na pakikibaka’t pagpupunyagi.

Ang mga silid mo’t pasilyo
ang siyang nagtulay
sa aking kamulatan at kawalang muwang.

Ikaw ang sumabay sa aking mga unang paglalatag ng mga pangarap
Ang nagpaniwalang liwanag ang higit na bahagi ng mundo
Ang nagkubli ng katotohanan ng mga kabiguan at kapighatian.

Sa Iyong mga bisig
natagpuan Ko ang mga nilalang
na ngayo’y katali di lamang ng aking buhay

kundi ng akin ding kaluluwa.

Sa kawalan ng masusuungan, sumandig kami sa isa’t isa, at nakatagpo ng lakas
Umindayog kaming sabay-sabay sa pintig ng pagkakaisa sa kabila ng pagkakaiba
At sumaliw sa malabong linaw na kumpas ng hangad ng dakilang manlilikha.

Sa aming paglisan
di Ka namin malimutan

sapagkat ang hugis Mo,
ang kulay Mo,

ang dunong Mo,
at oo, maging,
ang buhay Mo,

ay bahagi na ng aming
buong pagkatao.

para sa MAS HS Batch 1990